Еўрарэгіён “Нёман” лучыць памежныя рэгіёны Беларусі, Літвы, Польшчы і Калініградскай вобл. (РФ). У яго ўваходзяць:

-          з боку Беларусі – Гарадзенская вобл.;

-          з боку Літвы – Віленскі, Алітускі і Мар’ямпальскі паветы;

-          з боку Расіі – Гусеўскі, Красназнаменскі, Несцераўскі, Азёрскі і Чарняхоўскі раёны Калінінградскай вобл.;

-          з боку Польшчы – Падляшскае ваяводства (акрамя часткі, што складае былое Ломжынскае ваяводства), частка Вармінска-Мазурскага ваяводства (гміны ў складзе былога Сувалкаўскага ваяводства).

Мэты еўрарэгіёну:

-          заахвочванне транспамежных зносінаў і супрацы чатырох краін;

-          пераадоленне ізаляцыі жыхароў суседніх рэгіёнаў:

-          падтрымка росту і развіцця гаспадаркі і інфраструктуры;

-          павышэнне ўзроўню жыцця людзей.

Еўрарэгіён існуе з 1997 года, дзейнасць у яго рамах ажыццяўляецца органамі ўлады еўрарэгіёну, заснаванымі на тэрыторыі кожнай з чатырох складных частак. Кожная з краін па чарзе старшынствуе ў еўрарэгіёне; у 2003 годзе гэтую ролю выконвае Літва.

Еўрарэгіён і НГА

Думка аб супрацы ўлад еўрарэгіёну з няўрадавымі арганізацыямі была выказаная на Форуме няўрадавых арганізацый еўрарэгіёну ў кастрычніку 2002 г. ў Гродне. Форум прыняў зварот да Рады еўрарэгіёну, прызначыў каардынатараў дзейнасці па супрацы з Радай у кожнай з краін.

15 траўня 2003 г. у паседжанні Рады еўрарэгіёну ў Друскеніках узяў удзел прадстаўнік грамадскага сектару Вадзім Вілейта (Віленскі звяз маладзёвых арганізацый «Круглы стол»). Была дасягнутая прынцыповая дамоўленасць аб супрацы і вырашана заснаваць працоўную групу НГА пры Радзе еўрарэгіёну «Нёман». Адпаведныя рашэнні занесеныя ў пратакол, а сумеснае мерапрыемства маладзёвых арганізацый еўрарэгіёну – летнік «ПоЛіБелКа» (Піянерскі, РФ, жнівень 2003 г.), а таксама Фестываль нацыянальных культур еўрарэгіёну (Азёрск, РФ, чэрвень 2003 г.) ўключаныя ў каляндар дзейнасці еўрарэгіёну.

Прыцягненне НГА да праектаў у рамах еўрарэгіёну дазволіла б якасна палепшыць дзейнасць па дасягненні мэтаў еўрарэгіёну, павялічыла б аб'ём падтрымкі з еўрапейскіх фондаў, несла б карысць абодвум бакам.